Noch es paar Joor unorganisiertem fasnächtle, hänn mir letscht Joor dr Zyschdig-Club gründet. An dr Fasnacht 2010 sinn mir also zem erscht Mool als Zyschdig-Club am Fasnachtszyschdig uff dr Gass.
Am Nomidaag triffsch uns mit de Kinder und em Waage in der Innestadt, am Oobe bim Gässle und Intrigiere.
Unser Sujet 2010 „Baselopoly“.
Fiir alli, wo uns nit träffe, do unsre Zeedel.
****
Dr Wirtschaft granggt und unsri UBS liigt im Drägg
In suur Öpfel bisst dr Styyrzahler, au si Batze isch wäg
Es paar Männer in dunggle Azüg hänn uns ins Eländ gritte
Nit s Fasnachtscomité, sondern Bängger mit digge Schlitte
Dr Lagg isch ab, dr Glanz verblasst, s isch ganz übel
Als Retter in dr Not kunnt e alt Maa, dr Ossi Grübel
Äär machts wäg dr Eer, em Eergyz und em Stutz sicher au
Fascht gratis macht’s dr Schumi, dä will wäg vo dr Frau
****
Dr Schwoob vo dr Stadtreinigung isch am gleene, ach ojee
D Sperrguetabfuhr wurd schlimm missbrucht, immer mee
Au d’Gigi duet Groos-zügig entsorge und nadierlig usestelle
Und au bi Ziiri darf dr Trainer bald uf sy Entsorgig zelle
Villicht hetti me dä Ziircher nit solle uss dr Stadt verjage
Denn jetzt hänn bim FCB nur no d Schwoobe saage
****
Me kunnt hit kuum dra verbyy, s hett en jede Lappi
Kai iPod hösch, sondern als Stadtfiirscht e Stapi
Bi uns z Basel treit dr Guy Morin stolz dä Huet
Und ein jede froogt sich, für was isch dä guet
Vyyl gseit hett är nonig, sich meischt uhsegwunde
Als Arzt isch är halt an d Schwyygepflicht bunde
****
Drämmli, Drämmli, Drämmli und no e Drämmli
Nei dasch nit de Väärs vom “uff di warti nämmli”
Auti, Auti, Auti und e Stau bis fascht uff Solothurn
Dasch s Stroosebild an dr Eröffnig vom nei Saturn
Und bisch denn im Stücki aakoo, grad bi dr BaZ
Waartsch nomol, uff der Suechi nocheme Parkplatz
****
Ob Schönebuech, Muttenz oder Gränzach, alli glaage
Si mien d Konsequänze vo de Chemiedeponie draage
Dr BaZ- Hagemaa kennt sich uss mit sonere Buurdi
Und äär weiss au, wie me sone Altlast wiider los wurdi
Die BaZ gheert jetzt eme Rambass und eme Tessiner au
Bim Tessiner stimme ämmel d Farbe, die sinn rotblau
****
Im Glaibasel hets Charivari das Johr e Päuseli gmacht
e grooss Loch im Unterhaltigsprogramm vo dr Fasnacht
ganzi Löcher duen sich au in dr global Finanzwelt uff,
die einzig Branche mit schwarze Zahle sin alwä d Puff
Aber sälbst im Rotliechtmilieu isch d Konkurränz grooss
Wägem Rauchverbot gönn nämmli bald alli uff d Strooss
****
Al Dschasira brichtet iber d Fasnacht, dasch kei Bruns
Ob die Baseldytsch verstöön, das frooge mir uns
I ha drum welle e änglisch Väärsli brinzle, ganz digg
Aber exgyysi my friends, my english is under all pig
Geegeniiber Minarett Initiative isch me z’Basel liberal,
ob Burka, Ueli, Pierrot isch an dr Fasnacht doch egal
****
Hesch ghört 
Kommentar verfassen